قاسي بالعامية !!

Untitled Post

 

 

لسلام عليكم ورحمة الله وبركاته ,,

صباحكم عسل ان شاءالله ..
بتكلم اشوي بالعامية وباخلي العربي الفصيح لأهله هالمرة .. شخباركم وشمسوين بصراحة قاعد من وقت وماعندي شي اسويه ,, قمت خذيت لي دوش المفروض يكون سريع بس اشوي طولت ,, ونظفت غرفتي وبخرتها  وعملت لي كوب شاي وكلت حمص بالغلط  !! شفته في الثلاجة على بالي طبق حلاوة بصراحة ,, على بالي sweet .. مادريت انه حمص !! 😀 انا كذا اذا تمللت تشوفوني كل ربع ساعة انزل المطبخ احوس اشوي وارجع ,, يعني اللي يشوفني يقول ان في كل مرة انزل راح احصل شي جديد !! يااخي نفس الصحون  والاطباق الي خليتهم قبل ربع ساعة موجودين الحين .. لكن الملل ومايسوي
سويت اشيا مالها داعي ماادري ليش بصراحة ,, وعلى فكرة عندي امتحان بعد تقريبا ساعة ونص ودقيقتين بالضبط اتمنى انكم تدعون لي بالتوفيق ان شاءالله ..
(الحمدالله كان الامتحان رائع والدكتور ماقصر بصراحة قعد يحل لنا الاجوبة والغش على افا من يشيل نفس مايقولون يعني ان شاءالله علامتي تكون مرضية, بصراحة اول مرة استانس في امتحان بهالطريقة, استاذنا مدرس في امريكا وكندا ولندن وهو مصري الاصل وبصراحة عقليته متفتحه لدرجة انه اول ماشاف ان اغلب الطلاب محتار في احد الاجوبة قعد يحله معانا في وسط القاعة وامام المراقبين, على الله بس مايسببون له مشاكل وربي يجزيه ويسهل عليه نفس ماسهل علينا)

اتصلت حق مكاني الموقر (القهوة) قلت بروح بقعد باشرب لي شيشة وعصير وخاطري في جوكلت كيك وبادرس اشوي وبروح الجامعة للامتحان, بس لسوء الحظ انهم يفتحون الساعة 10 الصبح من بعد ماكانو يفتحون الساعة 8 ماادري ليش بصراحة !! (بعد الامتحان رحت القهوة وشيشية وطلبت لي موزة بعد قعدت اقشرها واكلها 😀 .. بصراحة مادري شهالتصنيفات الي تنزل علي وتوني راجع بعد ماتجمعت وقعدت من الربع سوالف وضحك )

خاطري في حصالة !! 🙂
ماادري شطاري علي اليوم ..
خاطري اشتري حصالة .. واعتقد ان الحصالة يعني كل دول الخليج يسمونها حصالة ماادري اذا في حد يسميها غير ..
تذكرون الحصالة الي تجيكم فخار وفيها فتحة صغنطوطة وتحطون فيها العملات !! ماادري شنازل علي اليوم قلت باروح لمصنع الفخار او محل يبيع الفخار وباشتري حصالة لي ولبنات اختي وعيال اخوي بعد لازم, مممم او شكلي باشتري لي بروحي مافيني شدة مصاريف وخساير,, تعرفون بعد اذا شريت حق فلان لازم تشتري حق علان والجماعة والشلة المشتلة كلهم,, بس يستاهلون حبايب قلبي 😀
(شريت لي حصالتين hehehehe خليت لي وحدة حق الازمات الي عادي تنكسر بأي وقت والثانية بدايتي فيها بدينارين استخسرت احط اكثر بصراحة 🙂 )

اعتقد ان عندي عطلة الاسبوع الجاي كامل ,, عطلة من الجامعة فكرت اني اسافر بس بصراحة حسيت اني مصختها واجد واجد !! يعني بصراحة ماعتقد اني بتجرأ اقول لابوي اني ابي اسافر,, يعني وايد الموضوع زاد عن حده هذاني كل اسبوع وترك طقيت الدرب وسافرت ,, الثقل زين والركادة زينة !! 😀  باقضب ارضي وبامسكها وبحاول اراجع وادرس اشوي ابرك لي على ماعتقد .. (اعتقد اني بقعد اسوي مشروع مادة التسويق واكيد ابي مساعدتكم في ملئ الاستبيان الي راح اعمله ,, لاتبخلون علي)

ان شاءالله مخطط ان اليوم اذا الله اراد ارد على التعليقات الي شاركتوني فيها ,, ساعات مايكون عندي الوقت الكافي اني ارد واشكركم على تعليقاتكم ,, ليس اهمال او تجاهل بالعكس ,, لو  الود ودي اخصص موضوع كامل لكل شخص فيكم اشكره على التواصل الدائم والتعليقات الي دائما ماتسعدني وماعتقد انكم تحسون شكثر يعني لي تواجدكم ومناقشتكم ومشاركتكم معاي .. على الرغم من اني افتقد بعض زوار مدونتي الي عودوني على تواجدهم الدائم ولكن حجة الغايب معاه .. 😦 (ان شاءالله اوفي بوعدي وارد على تعليقاتكم اليوم يارب بعد مااتغدى او بعد مااصحى من النوم لاني من امس سهران :()

ممممممم ..
احس من النادر اني اطلع لنفسي العنان بهالشكل واتكلم بالاسلوب البسيط والعامي بدون مراجعة وتدقيق ,, لكن اتمنى انكم تتقبلون هالاسلوب ولو لمرة وحدة .. احس اني مللتكم من مواضيع الحزن والملل والكآبة وممزقا انا واشوي وبنتحر .. بالعكس الحياة حلوة وتفائلوا بالخير تجدوه   ,, الحياة من جد حلوة وخصوصا هالجو الحلو هالايام والبرد الي يخليك تحس بطعم الحياة ونفس ماقال اخوي محمد بن سالم صاحب مدونة وتر في مدونته حرام الواحد مايستغل هالجو بصراحة ,, طلعوا غيرو جو  .. حاولو تتمشون في السيارة بدون مكيف ومنزلين الدرايش !! احساس حلو .. (جربو وقولو لي لاتنسووووون)

ماراح اطول عليكم اكثر   ,,, بقوم اغير ملابسي واليوم قررت اني البس الجينز والكاب ,, 😀 من اول ماداومت وانا دوم ثوب وغترة ثوب وغترة ثوب وغترة ,, وطبعا بين كل محاضرة ومحاضرة اروح وانتو بكرامة دورة المياه عشان اشوف الكشخة اشلون واعدلها, على الرغم من عشقي للثوب والغترة الا ان التغيير حلو  ,, (طبعا اغلب الطلاب ماعرفوني حتى دكتوري ركز فيني ليما عرفني:))

جددو .. غيرو  .. حبو .. اعشقو .. عيشو حياتكم .. من نساكم انسوووووووه ولاتشغلون بالكم معاه ..
تره اللي يضيع فرصة انه يعيش موقف مفرح ,, ماعتقد انه يستاهل انه يعيش سعيد ابدا !!

 

التحديث: باللون البرتقالي

sign23.jpg



Advertisements
هذا المنشور نشر في SwALif. حفظ الرابط الثابت.

17 Responses to قاسي بالعامية !!

  1. Hayat كتب:

    قااسي
    هههههههه ضحكتني ع موضوع الحـصالة
    اعتقد ما تحصل بيت بالبحرين مافيه حصالة 😛
    وبالتـووفيق بالامتحـانات

  2. هههههههه

    احلى شي لمن تمسك مع الواحد اشياء غريبه..

    ربنا يوفقك في امتحاناتك

  3. lizardo كتب:

    اي خلاص هدينا الايسي للصيف القادم !

  4. ME كتب:

    موضوع خفيف و متنوع كالعادة …… الله يرحم ايام الحصاله هههه …

    شو هالنفسيه الحلوه (ماشاءالله) … الله يدوم عليك هالمرح و الوناسه
    و موفق ف الدراسه ان شاء الله =)

  5. mariamh كتب:

    هههههههههه
    اليوم كنت في السيارة وتذكرتك موضوعك ففتحت الدرايش والله إحساس حلوو 🙂

  6. DUBAI كتب:

    قسوي

    البوست جدا متفائل و فرح ..

    عساك دوم مبتسم و فرحان يا رب ..!

    صح كنا نقول حصالة .. ذكرتنا بأيام جدا جميلة : )

    أنا اقول استريح و ذاكر و بسك سفر .. ترى الجو ألحين عندنا ما يتعوض !

  7. Panadol Extra كتب:

    حلو التفائل …

    شفت شلون لانك تفائلت جبت زين في الامتحان

    وبعدين وين حصالتي؟؟؟؟؟؟؟؟؟؟؟؟؟؟؟؟؟؟؟؟؟؟؟ 😀

  8. بحرينية كتب:

    و انت جذي صححح
    على قولة اخواننا المصريين
    محدش واخد منها حاجة
    من جذي لازم نخلي مساحة للفرح و التفاؤل و الابتسامة
    اعتقد اللي اخترع الحصالة جدا عبقري لانه مع الوقت
    يتجمع لك مبلغ شغل عدل بدون ما تحس
    و على قولة الوالدة
    الدنيا مثل الحصالة كل شي تحطه فيها تحصله بالنهاية !!
    شكرا لك يا قاسي مشاعر على البوست 🙂

  9. Gasi كتب:

    Hayat

    ان شاءالله هالضحكة دوم
    وتسلمين اختي

  10. Gasi كتب:

    محمد بن سالم

    اكيد انه احلى شي 🙂
    ويوفق الجميع يارب

  11. Gasi كتب:

    lizardo

    هههههه لا عاد مب لهالدرجة
    ليحين اشغله انا 🙂

  12. Gasi كتب:

    ME

    مرورج اهو الاحلى
    ووناستي بيكون بتواصلكم اكيد
    شاكر لج المرور 🙂

  13. Gasi كتب:

    mariamh

    ههههههه الحمدالله ان في حد طبق الدرب 😀
    بس هالايام الرطوبة صارت تذبح

  14. Gasi كتب:

    DUBAI

    هلا دبوي 😀
    استانس لين قلتي لي قسوي تدرين
    وان شاءالله هذا احنا استرحنا ونبي نذاكر مب قادرين 🙂

  15. Gasi كتب:

    Panadol Extra

    اكيد حلو التفائل
    وثانيا تراني خاشها لك لاتخاااااف 😀
    هههههه بس شكل حصالتي بتنترس بسرعة فخليتها لي احتياط 🙂

  16. Gasi كتب:

    بحرينية

    وانتي بعد صح 😀
    على بالي كنتي تقولين محدش بياكلها بالساهل 🙂
    واكيد كلام الوالدة صح على قد ماتعطي على قد ماتاخذ
    شاكر لج مرورج

  17. ريحة العود كتب:

    وناسه والله والله والله أناسه نركب لنج وانروح لنبي صالح تفاح اخضر ولوز وبمبر خخخخ خ

    <<< شكلها فاضيه البنت

    أخوي تشكر على البوست العجيب والمتنوع
    صراحه فقدت الكلام والمواضيع الحلوه واللي تحمل معاني كبيره
    وانحس روحنا عايشين معاهه بكل دقيقه .. ربي يعطيك العافيه
    وعساك عـ القوه 🙂

    ترى انه من عشاق الحصالات بس ماحس الحصاله الفخار تنفع
    والسبب انه في اي وقت تنكسر .. هالمركه سويت لي حصاله
    شكلها على صندوق امبيت وخليت النخار يسكرها كلها يعني ماقدر
    اخذ منها ولا فلس والحمدلله الحين اكي متروسسسه وانطرها تنترس
    اكثر واكثر واستفيد من هالبيزه خخخخخخ خ 🙂

    والله يوفقك

    يله بنتظار القادم والجديد
    دوماً

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s