شماعتنا .. مؤامرتهم

  drail.jpg

 

تخيلوا انكم نايمين الساعة 5 الفجر, وراكم قعدة الساعة 9 الصبح ومحاضرة بالجامعة, وفجأة بدون سابق انذار تصحون على صوت (دريل) وحفريات في الشارع الساعة 7 الصبح !!
صورته لكم من دريشة غرفتي, والله عشان تحسون بمعاناتي اليوم, قمت مع صداع فظيع غير طبيعي, اصحى من الصوت ويسكتون وتغمض عيني على امل انهم خلصوا, ويرجعون وبس وهذي سالفتهم ليما رحت الجامعة وانا حاقد عليهم, طلعت لهم وطالعتهم بنظرة كلها حقد وكراهية 😀 , كرهتهم من قلب.

اليوم اشوي راح اطلق لنفسي العنان وراح اكتب موضوع واخذ عهد على نفسي اني مااراجعه 100 الف مرة قبل لاانشره, وانشره على طول, وراح اكتبه باللغة العامية, فيعني اذا شفتو خطأ املائي او كلمة بحرينية ماعرفتوها حاولو تفهمونها بروحكم 🙂
باقي على الفطور تقريبا نص ساعة راح احاول اقضيها كلها معاكم وانا اكتب الموضوع.

رحت للجامعة اولى محاضراتي كانت محاضرة ادارة (management), مع الدكتورة اياها, بصراحة سبحانه اللي يغير ولايتغير, اسلوبها متغير مش 180 درجة, بل متغير 360 درجة ودرجة وحدة زيادة عن خاطري, يمكن عشانا في رمضان؟!, اتذكر انها كانت تسمح بتأخير الطالب في رمضان فقط وبما اننا بدينا الفصل في رمضان يعني ماادري هل هالاسلوب متبع بس في رمضان او في كل الاوقات, ولكن على حسب ماسمعته من كذا طالب والعهدة على الراوي ان اسلوبها تغير من يوم مشكلتي معاها وبدا اسلوبها بالتحسن كثيرا مع الطلاب وبدت تحترمهم, واليوم لاحظت هالشي من طريقة كلامها مع الطلاب وطريقتها معاي واشلون وقفت للطلاب تكلمهم, بالعادة تمشي وتحقرهم وتخلي الطلاب يركضون وراها يترجونها تعطيهم من وقتها 5 دقايق.

انا ماعتقد اني ذكرت لكم بداية مشكلتي معاها, واليوم بما ان مافي موضوع في بالي حاليا راح اقولكم السالفة مفصلة وتفصيلا.

الله يسلمكم هالدكتورة معروفة على مستوى جامعة البحرين بأسلوبها الصارم والقوي والجاف والـ .. اللهم اني صائم.
لدرجة انهم عملوا معاها مقابلة في الجريدة على انها اكثر دكتورة جامعية عليها شكاوي وانتقادات من الطلبة.
يعني تخيلوا انكم قايمين تقدمون بحثكم وتشرحون وبعد ماتخلصون تقول لكم: what is this trash ? ( شهالخمام الي قدمته ) وانتم بكرامة, وتواصل في تهزيئها للطالب, لو قاعد وماخذ علامة الرسوب بكرامتك افضل من انك تقوم وتحرج نفسك !!
تعلمون لأي درجة الطلبة وصل فيهم الكره لها؟
بأنهم اطلقوا موقع في الانترنت يحمل اسم (unti واسم الدكتورة) على غرار الانتي فايرس!!
وقامت الدنيا, حيث وصل الموضوع للمحاكم بعد تقديمها شكوى رسمية على راعي الموقع, وتم منعه وتوقيفه بأمر من المحكمة.

بداية المشكلة بأنها قامت بارسال انذار بسبب تغيبي عن محاضرتها بعد غيابي لحوالي 4 حصص.
والقانون الجامعي ينص على ان الانذار يرسل بعد 7 حصص, وبعد 12 حصة غياب يحرم الطالب من دخول الامتحان.
فاعترضت على الانذار, على اساس ان الانذار لايرسل الا بعد 7 حصص, فجاوبتني : 7 حصص WF, اي 7 حصص انسحاب اجباري وحرمان.
وطبعا انا هادي وحبوب وطيب, ولكن لحد يدوس لي على طرف:)

وفي محاضرة ما في يوم من الايام, وجهت كلامها لاحدى الطالبات بأن الانذار في الدرب آتي لها, فدار هذا الحوار بيني وبينها:
– But we have reasons ( ولكن لدينا اعذار للغياب)
– If u doesn’t have it from government agency then I can’t accept it (اذا كانت الاعذار غير مصدقة من قبل جهات حكومية, فانني لن اقبلها)
– Why you are not helping the students (لم لاتساعدين الطلبة؟)
– Why should I? if they are not helping them selves why should I help them? (ولماذا؟ اذا هم لايساعدون انفسهم فلم افعل انا؟)
– You are a doctor; you must help your students we are not in a school. (انتي دكتورة ونحن في جامعة وليس في مدرسة )
– This is the laws and I’m doing it (هذه هي القوانين وانا اطبقها)
– Does only you that apply it? ( فقط انتي من تطبقينها؟ )

طبعا هنا ارتفعت حدة صوتها, بعد ان استوعبت بأن محمد الطالب المؤدب الي مايطلع صوته في الصف جالس يناقشها في اسلوبها ويعترض.

– All the doctors are, and if you don’t know the rules go up to the administrator office and check how many warning there is, and if you don’t know the rules then SHUT UP ( كل الدكاترة يطبقون القانون واذا كنت لاتعلم ذلك اذهب لمكتب الادارة وانظر كم انذار ارسل, واذا كنت لاتعلم القانونين , جب !! )

بصراحة اسمحو لي على هالتشبية ولكن مااعرف كيف لساني تحول من لغة ضواحي نيويورك الى لغة ضواحي ودواعيس المحرق !!
واعدل جلستي واقابلها.
تكلمين من انتي؟
ومن تقصدين بهالكلام؟
انا ولد عايلة محترمة وانتي تعرفين هالشي وتعرفين انا من, انا مش من الشارع نفس الي مرو عليج بيسكتون لج.
وتطلب مني الخروج واجاوبها: اعتقد انج تشوفين اني قاعد ارتب كتبي يعني بطلع بدون ماتطلبين ماعتقد اني محتاج محاضرتج من الاساس!! طبعا مع صراخ مادري كيف تجرأت وطلعته؟
والخ الخ الخ الخ, واهي ساكتة مب مستوعبة, وتبي تتدارك الموضوع وتهديه وماعتقد انها عارفة كيف.
وانا بيني وبينكم من قبل لاادخل المحاضرة كنت مستعد لهوشة ومزاجي متعكر يعني جاي وجايب الشر معاي نفس مايقولون 🙂
وقبل لااطلع رميت عليها كلمة كانت من احدى اسباب فصلي…
طبعا قبل صفقة الباب الي انكسر الباب بسبتها قلت لها: ( اسلوبج قمة في الحقارة, ماشفت مثله ابد ولااعتقد راح اشوف .. ياالحقيرة )

وطبعا تطور الامر الى مشادة بيني وبينها عند رئيسة القسم خلت الطلبة يتجمعون ودكتور التسويق يمسكني ويبعدني عنها, وخلت العميدة تطلع من مكتبها والحالة حالة.
وبس
استدعوني بعد فترة للجنة التحقيق وحولها للجنة التأديب, واصدروا قرار بتوقيفي لمدة فصل تأديبي واحد.

بس الحقيقة يقال, على الرغم من اسلوبها الا انني اعترف بأني اسلوبي كان غلط نوعا ما, كان يجب اني احترمها واناقشها خارج الفصل ومااحرجها قدام الطلاب.
وعلى الرغم من معاملتها وقسوتها الا انها تمشي على القوانين بحذافيرها, تسعى لتعليم الطلاب معنى الانضباط.
الي سمعت عنها انها ماتظلم بالدرجات وتعطي كل صاحب حق حقه.
ونفس ماقلت لكم اسلوبها تغير جدا, شرحها رائع, وعلى الي صار وعلى انها كانت السبب بطريقة او اخرى بفصلي وتأخير حصولي على الدبلوم الا انني بالفعل بالفعل بالفعل, اكن لها كل تقدير واحترام, وهالشي الي من الممكن مخليني التزم في محاضرتها وماغيرتها وتام وباقي معاها اواجها واناقشها بالمواضيع الدراسية, بل حتى اني اليوم عرضت عليها طباعة الملخصات الخاصة بالمادة لانها مش متوفرة عندها, وعرضت اني اساعد الطلبة واشرح لهم, وكأن شيئا لم يكن.

.

 

marfa2.jpg  

 

المرفأ المالي المقام حديثا في البحرين, وسيكون مركز تجاري ومالي في المنطقة, سمعت من احد زملائي الي سمع هو الاخر من احد زملائه بأن هناك صليب على المبنى, وطبعا بما اني امر عليه كثير في روحتي وجيتي من الجامعة, توقفت عند اشارة المرور المحاذية للمبنى وجلست اتأمل وصدت الصليب الي يقصدونه, وصورته.
بصراحة مااعرف اوصف شعوري, ولكن هل هو مقصود ام غير مقصود, وهل هو صليب او مجرد تفسير وتأويل.
نفس ماقالو ان مصمم برج العرب قال وتفاخر بأنه قدر يبني اكبر صليب موجه للقبلة, وماشفت دليل او كلام منقول على لسانه في مقابلة او موقع.
بصراحة نفس ماقلت ماقدر اوصف شعوري, انقهرت على الرغم اني دائما ماارى بأن قضية المؤامرة على العرب والمسلمين قضية استهلكناها كثيرا واصبحت مجرد شماعة نعلق عليها اي شي نشوفه.

 

 

sign23.jpg

 

Advertisements
هذا المنشور نشر في SwALif. حفظ الرابط الثابت.

22 Responses to شماعتنا .. مؤامرتهم

  1. lizardo كتب:

    هههههههههه !

    حتى هذا صار صليب !!

    ابي اعرف ليش مايفكرون يسون مثله اول عقب يتفلسفون كالعادة!

    زين وعرفنا قصتك يا قاسي !

  2. ME كتب:

    ktbt l3leeeeeeeeeeeeeeeeeeeg shkbrah o a5r shy ma y6l3 bsbat hal
    anti-spam word

    anyway ur page is my FAV one

    I like ur daily things so keep it up

  3. DUBAI كتب:

    Ya Shdeed Enta : D

  4. ماشاء الله عليك لازم اتعلم منك كيف اكتب ببوست واحد فيه كذا موضوع مترابط وله قيمته

    بعدين وين ال10 بوستات هذا وانته واعدني ههههههههههههه

    الصراحة بالنسبة لموضوعك مع الدكتورة الي ود ياشوفها بس والي اتخيل انها تشابه دكتورتي الي بطت جبدي
    انا اوقف معاك في ردة فعلك على الي صار مع انه المفروض يكون في تفاهم و اسلوب ارقى بس العصبية و ردة الفعل هي الي تخلي الواحد يسوي جيه ما علينا الي فات مات و شكل العين الحمرا بتيب نتيجة طيبة….

    ياشين الصبح اذا بديته بازعاج و تكدير و انجلب مودك للاسوأ و السبب انك ناش على صوت درل والا قطاو يضاربن والا على صوت مطرقة،،،،الي يبا عمره يقوم من جدامك والا بيروح فيها

    سالفة برج العرب و الصليب و المباني الي تمشي على نفس المنوال ملينا منها و للحين شاكين في صحتها
    الله يعيننا يارب

    عساك على القوة يا خوي قاسي

  5. إحسان كتب:

    اظن سوالف بناء الصلبان على المباني اصبحت اشياء مالها معنى

    لا اظن يوجد مؤامرة او اشياء من هذا القبيل, ولكن الناس اصبحت فاضية فقاموا يدققون في الأشياء أكثر من اللزوم حتى يطلعون عيوب غير موجودة او غير مقصودة…

  6. يا اخي الفاضل الناس اللي كل شوي مالها غير ان الغرب مجرمين و يحاولوا يشوهوا ديننا و يعملوا صلبان في

    بلدنا ناس فاضية و اتمن انها تشوف شي مفيد يشغلها

  7. مهــاري كتب:

    أوووووووووووووف ياكره النوووم اذا قمت على الازعاااج
    بصرااحه انا من بدى رمضان وانا ما ارقد عدل كله من عيال الفرييييج
    يعني مايعيبهم يولعون الشلق والقنابل >> ماعرف اذا انتو تقولون هالمصطلح ولا تسمونه شي ثاني
    الا وانا فعز رقادي بالليل ,, يقهروني والله صرت احلم اني فحرووب وانا اركض واركض لازم أوصل الحدوود خخخ (( الله يحفظ الأمن والأمان فدولتنا الحبيبه ))>> قصة حياتي بس شو اسوي والله مقهووره منهم

    بالنسبه للدكتوره بصراااحه الي راح راح ماقدر الومك على اسلوبك وياها قبل بس عيبني موقف وياااها الحين انك ماغيرت وقت المحاظره وانك بعدك تناقشها وتواجهها بكل احترام ,,تعرف احس انها بتغير رايها فيك وترجع في نظرها ((محمد الطالب المؤدب+إلي فوقت الشدايد شديد )) هع

  8. محمد كتب:

    موقف لاتحسد عليه اللي مع الدكتورة 🙂

    بس الله يعينك ..

    بخصوص موضوع الصليب، فما أدري وش أعلق عليه..
    بعض الأحيان أشعر أنه مقصود وبعض الأحيان أقول مين اللي راح يفكر كذا 😀

    تحياتي لك ولمدونتك الرائعة 🙂

  9. ما شاء الله ما شاء الله، ثلاثة مواضيع مرة وحدة 😀

    الموضوع الأول :- توه اليوم صار نقاش فيه، خالتي اليوم قاعدة اتسولف عن وحدة وياها من “المعذبات” في أيام التسعينات فتقول لأنه حطوها في غرفة كلها أصوات أحين هي ما تتحمل أحد “يصارخ” صوبها و إذا صارت في محل فيه “جمعة” وناس اتسولف تطلع دايركت لأنها ما تقدر على الفوضي

    فتذكرت حالي، لأني اذا الي يقعدني من النوم يفتقر إلى الرقة و الحنان – وهو الي يصير غالباً إذا مو دائماً – أقعد متنرفز و أظل متنرفز إلين ما انام متنرفز .. لذلك الله يساعدك 😀 صراحتن

    الموضوع الثاني :-
    “وهل يخفى القمر” المقصودة أشهر من نار على علم، و مثل ما قلت كثير عدهم مشاكل وياها .. خبر حلو انها تغيرت على البركة وعقبال عند الباقي

    لكن اتصدق الناس الي هاللون مثل ما قلت يبغون يعلمون الواحد الانضباط و يبون يعطون كل ذي حق حقه، و ألحين انا قدرتهم كل التقدير بعد ما صرت في جامعة ” دكان” ادفع و شيل شهادتك! .. صحيح أن تطرفهم لهذه الدرجة فيه خطأ لكن أعذرهم خصوصاً لأني اعتقد أن محد يصير جدي إلا إذا كان فيه سبب، أذكر عدنا استاذ بالمدرسة نفس نموذج هذا، لكن اذا تسأل عنه تعرف انه كان سابقاً يدرس بالجامعة لكن لأنه اعتقل ” ايام التسعينات بعد ” وفقد وظيفته .. يمكن ما اقول تعذره بس تقدر السبب .. و على الأغلب صدمة نفس الصدمة الس سببتها انته كفيلة بأن ترجعهم طبيعين

    الموضوع الثالث
    ويش إمصلب إبه!

  10. بحرينية كتب:

    يمكن ما كنت راح تنفصل فصل كامل لو ما ختمت الحوار بكلمة يالحقيرة !!
    بس بعد لو نشوفها من جانب ثاني بنلاحظ انك من الممكن ان تكون قد لقنتها درسا
    بحيث انها سوف تحسب حسابها في المرة القادمة و راح تتعامل مع الطلاب على اساس انهم ناس فاهمة و عندها ظروف ممكن تخليها ما تقدم بروجكت بالمستوى المطلوب او حتى تغيب عن المحاضرة
    نعيش و نجوف
    نعيش و نسمع
    نعيش و نقرا عن مواقف مثل هاذي
    شكرا يا قاسي على البوست و ممكن الاعتقاد بأن احنا واقعين تحت نظرية المؤامرة يعطينا شعور بالاهمية من جذي بين كل وقت و الثاني طلعوا لنا بسالفة من هالنوع

  11. Gasi كتب:

    lizardo

    اي والله من بدال مايقعدون كأنهم يطلعون الاخطاء السبعة
    ليه مايفكرون يسون مثله 🙂
    شوووووكرن على الرد وهالتواصل

  12. Gasi كتب:

    ME

    😦
    ان شاءالله نشوف تعليقج في المشاركات الثانية
    معنى اذا حد يكتب بوست وماينشر يكون عندي محفوط لين مااعطي البرمشن انه ينزل
    بس ماشفته خسارة
    بس على العموم ثانكس على المتابعة

  13. Gasi كتب:

    DUBAI

    احم احم
    عيل اشلووون عيل
    نعجبج افا عليج

  14. Gasi كتب:

    بنت الاجاويد

    ههههههه عاد انتي الله يهداج صدقتيني بسرعة
    لو اقدر والله من عيوني
    والحمدالله ان في حد واقف معاي بردة الفعل وماطلعني اني غلطان
    شكرا على هالتواصل الدائم الله لايحرمني منه

  15. Gasi كتب:

    إحسان

    بالفعل اصبحت لديهم من الفضاوة مايشغلونها بأشيا مالها معنى
    شكرا على مرورك الكريم اخوي احسان

  16. Gasi كتب:

    محمد بن سالم

    وانا اتمنى كذلك ايضا اخوي محمد
    شكرا على هالتواصل

  17. Gasi كتب:

    مهــاري

    يسلمو اختي على الرد اسعدني تواجدج معاي
    وهههههه الشلق والقنابل نسميها بالبحريني = شراخيات 😀
    لووول مادري ليه عجبتني كلمة الشلق
    وآمين يارب ربي يحفظ لنا الامن والامان في خليجنا كله

    وان شاءالله تغير نظرتها فيني بس وخصوصا باروح اقردنها بكرة ابي اسافر ومابي احضر محاضرة من محاضراتها

  18. Gasi كتب:

    محمد

    تسلم لي على المرور اخوي الكريم
    تواصلكم هو الاروع دايما

  19. Gasi كتب:

    الإمبراطور سنبس

    🙂 لو بيدي كان كتبت 10 والله
    – هذا مرض واتمنى انه يبعده عن كل احبائنا ان شاءالله يارب ومانوصل لهالمرحلة, وحط لك منبه التلفون على نغمة رومانسية وحلوة عشان تساعدك على جعل يومك حلو 😀 .. هههههه شرايك بفكرتي

    – ههههههه مستحيل ان القمر يخفى .. بس نفس ماقلت ان هالاشخاص مهما يكون تعاملهم الا انهم يعلمونك الانضباط والاحترام واعطائك حقك كامل في نظري ..

    – ماادري علمي علمك 🙂

  20. Gasi كتب:

    بحرينية

    بالفعل .. وبشهادة المسؤلين بأنه كان بالامكان تجنب الفصل الكامل لو لم انطق بهذه العبارات ..
    ومن الممكن ان يكون التغير بسببي او بسبب لايعلمه الا الله
    بس اتمنى انها تواصل على هالتعامل وهالاسلوب

    وعجبني تحليلج ..
    اعتقد اننا نعاني من النقص الكثير بحيث اننا نبحث عن اي شئ لجعلنا نشعر بأهميتنا

  21. Bride Zone كتب:

    واو!!
    عيل انت صرت بطل من مواجهة بنت العالي!!
    والله ييه الوقت اللي سكتوها فيه..! وين طلبتها من سنين مسوية لهم رعب الحين صارت اليفة؟ يعني خلاص ما تعض؟ 🙂
    طبعا -ولله الحمد- أنا ما درستني بحكم اني كنت بكلية العلوم وقتها “الحين صارت تكنلوجيا المعلومات”.. لكن أختي بسم الله ماشاء الله خذت وياها مقررين وكنت اسمع عن رقتها ونعومتها وطيبها وجمال أخلاقها مع الطلاب.. وشفت موقع Anti-…… اللي قلت عنه من سنين بصراحة ما يبون الواحد يتكلم حتى بالنت! مالهم حق يصكون المكوقع بس الشكوى لله..
    على العموم.. الجامعة على حلوها ومرها ذكرياتها حلوة.. وباجر لين تخرجت بتتذكر هالسوالف وتضحك وتقول اييييييييه ايام 🙂

    بالنسبة لموضوع الصليب.. والله هاليومين كل شي جايز بس مثل ما يقولون المعنى في قلب الشاعر.. وكل واحد الله يحاسبه على نيته إذا كان قاصدها ولا لا.. هذا مو معناته ان احنا نسكت واحنا نشوفهم يستهزؤن فينا بس بعد ما نستهلك طاقاتنا في ربط كل شي نشوفه برموز ثانية.. وجهة نظر..

  22. Gasi كتب:

    Bride Zone
    هههههههه الله يهديج
    يعني الحين انا من مساعة مابي اقول اسمها وجيتي انتي وبطيتي اسمها
    لكن كلمة حق تنقال والله وايد تغيرت وصارت شي ثاني بصراحة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s