الحسد .. والكشحة

 

 السلام عليكم ورحمة الله وبركاته …

اليوم حبيت ان اذكر لكم موضوع من فترة يراودني, موضوع الحسد المصحوب بالكشحة ايضا!!
والكشحة للاخوان الغير بحرينيين راح يكون معناها (النحس)

انا شخصيا من الاشخاص الي يؤمنون بالحسد وكانوا لايؤمنون بما يسمى بالكشحة.

الحسد:
إنّ الحسد هو تمني زوال النعمة عن المحسود ، وإن لم يصر للحاسد مثلها.
الحسد هو البغض والكراهة لما يراه من حسن حال المحسود.
وقيل :الحسد تمني زوال النعمة عن صاحبها سواء كانت نعمة دين أو دنيا.وقيل: أن تكره النعم على أخيك وتحب زوالها

الحسد ذكر في القرآن ولذلك كنت من المؤمنين ومازلت مؤمن بان الحسد موجود والعين حق, ومن الامثلة الي صادفتني ان في كل عرس من عرس اهلي لازم امرض واقعد اسبوع.
واتذكر ان صديقة امي تقول حق امي: محمد كأنه اهو المعرس. ماتكمل ساعة من كلمتها الا وانا طايح.

الكشحة والنحس:
ماكنت اؤمن فيه, وكنت اعتبره مثل ماتقولون خرافة, او معتقدات.
ولا اعلم بصراحة اذا كان له اساس في الدين او ذكر.
لكن تصدقون اني نهيت علاقتي مع واحد من ربعي بسبب الحسد الي فيه والي اقترن مع النحس, ومب اي نحس, احس من النحس الدرجة الاولى على غرار حروق الدرجة الاولى!!
سبحان الله, ولله في خلقه شئون, كل مايدري عن شي يخترب.
بدون مجاملة اي شي اي شي يحط عينه عليه او يدري انه بيصير, يخترب او مايصير. لدرجة اني احس ويهه صاير منخفس وعينه تصير حمرا, احس كله من آثار الحقد والحسد الي فيه والقهر الي يصيده لما يعرف ان احنا عندنا ربع غيره, وماراح اخش عليكم اني ساعات اذا اني في الكوفي اخلي وحدة تقرا لي الفنجال, على غشمرة طبعا , ان ثنتين ذكروا لي اسمه وقالو لي عنه !!!

احنا مثلا نقول بينا وبين بعض, شوف مثلا ابو فلان شجاب له هدية, او شوف فلان طلع له سيارة جديدة.
ويمكن نذكر هالشي مرة في الشهر !!
لكن اهو يجيبها على هالغرار: ليش احنا مانحصل, فلان وش احسن فيه منا؟! . شالفرق بيني وبينه؟ ليش احنا مالنا حظ !

حسد غير طبيعي, ياخي الرزق في يد الله سبحانه وتعالى.

واحمد ربي اني افترقت منه, فالحمدالله رب العالمين, من يوم ماعلاقتي انتهت وانا من احسن الى احسن.
مابي احسد روحي 🙂

لكن مايشغل بالي انه دوم يسأل عني ويسأل انا شسويت ووين رحت ومن ربعي؟!
وخصوصا القروب الي يمشي وياهم الحين يجون ينقلون لي اخباره, واقولهم مابي اسمع اسمه, صدقوني مجرد مااسمع اسمح تجيني حالة لااجد لها وصف. قرف على تغزز وخوف من ان النحس يصيدني منه.

قلت لكم اني ماكنت مصدق بسوالف النحس, ولكن مجرد ماقعدت اجمع الاشياء الي تصيدني, وخصوصا لما بديت اخش عليه او ماقوله الاشيا الصحيحة, وجدت الفرق شاسع !!
فكم يكون حالي باحس حال ومرتاح لما مايعرف الشي, ولما يعرف عنه او حتى يشك يخترب !!

اعوذ بالله من الشيطان الرجيم واعوذ بالله من هالاشكال بصراحة.

حتى ربعه الجدد تضرروا منه, يجون يقولون لنا انا ورفيجي عنه وعن اشلون ناحسهم واشلون يقارن روحه فيني انا ورفيجي واشلون يحسد !!
يعني لا انا ولا هم سالمين من عينه.

امس كان يومي حلو جدا جدا, السيف, سينما, الشيشة , وسهرة من اروع سهرات حياتي, وبعدها تمشيت ويا ربعي وبعدها طلعت ويا رفيجي.
وفي الاخير نزلت كوفي شوب, كان رفيجي ينتظرني هناك, وشفت الكشحة الي اقولكم عنه !!
ماتتخيلون اشلون تغيرت الواني وخفت على عمري وخفت حتى على رفيجي.
خفت ان احنا نتهاوش او يصيده شي لما يشوفه معاي.
فسويت روحي اني داخل ادور على شخص ومالقيته, وشفت واحد من ربعي سلمت عليه كان قاعد وياه, وحتى ماسلمت على الكشحة خفت لما امسك يده ينتقل لي شي او يصيدني مس 🙂
واتصلت حق رفيجي الي ينتظرني وقلت له اطلع بره ماعجبني المكان, خبركم الخوف ومايسوي.

وانا طالع بالغلط التفت وشفت الكشحة يطالعني!! نظراته تذكرني بنظرات الشخصية الشريرة في الافلام, ابتسامة وقحة وفيها خبث. ماعرفت معناها ولاابي اعرف معناها
ولكن كل الي اقوله:

بسم الله الرحمن الرحيم
قل أعوذ برب الفلق* من شر ما خلق* ومن شر غاسق اذا وقب* ومن شرالنفاثات في العقد* ومن شر حاسد اذا حسد
صدق الله العظيم

 ومن امس وانا اقرا على نفسي المعوذات, اخاف شي يصيدني لانه طالعني.

مادري هل الي فيني وسواس, او هل خوف على نفسي او حالة نفسية يمكن؟

 

 

Advertisements
هذا المنشور نشر في SwALif. حفظ الرابط الثابت.

6 Responses to الحسد .. والكشحة

  1. مريم كتب:

    الله يبعد عنك الحسد

  2. tito84 كتب:

    ايه والله
    الحسد معضلة
    زين سويت بقرار ابتعادك عنه
    الله يبعد الحسد عنك وعنا وسائر المؤمنين والمؤمنات

  3. coldpassion كتب:

    بااال !!! …
    لا فيك حالة نفسية ولا شي … لو انه جاان باااسوي زووود ….
    الله لا يعرفني على واحد من هالأشكاال … كلامك عنه خله شعر جسمي يوووقف!!!

    هااااي يبيلك اتحط فيه جهاااز عشااان كل ما اتجرب صوووبه ايصاااوي الجهاااز!!
    خب مشكله اصلية الحبيب

  4. coldpassion كتب:

    او باي ذا وي … لو ما عليك امر اتحط عليه علامة keep out! عشان اذا شفته ما اجرب يمة!!

  5. ][~(شيطونه)~][ كتب:

    (( أعوذ بكلمات الله التامه من كل شيطان وهامه ومن كل عين لامه ))

    الله يكافينا و يبعد عنا شر و بلاء العين و الحسد و يجنبنا أصحابهم يا سميع يا عليم !!

    و هذا حال الدنيا يالأخو لا تستغرب !!

    “حد لو تعطينه بالآنة المزاهد دوم فعيونه..وحد لو تمزر له ثبانه بعده يقول طشونه ”

    و الناس هالأيام لا حمدا و لا شكورا ..

    أطيب التحايا ..

  6. نورة كتب:

    شدتني جدا مدونتك الي طالما نسمع عنها فهذا الزمان وهو الحسد الحسد موجود فلقران ولكن تذكروا دوم ان الظلم ظلمات يوم الدين

    بخبركم قصة سريعه
    انا لي صديقه من سنين اعرفها ودخلت بينا صديقه جديده وبدت هذي الصديقة لجديده تزرع في راسي اشياء عنها وايد
    قررت فعلا اني انسحب من حياتها ونسيت لها كل وقفه وكل عشره وكل موقف حلو وكاني طلعت بنت حرام والعياذ باللله
    اتذكرها دعت وقالت حسبي الله ونعم الوكيل
    ودارت الايام واكتشفت انها ما كانت حاسدتني هي الوحيده الي مساندتني وواقفه معاي وكانت فعلا تحبني مره اكثر من اختها
    وتاخذ اخباري دوم تحب تطمن علي

    ومافي شي تغير غير احساس نفسي فاشل سيطر علي انه حياتي صارت احسن بعدها

    بس اكتشفت ماهو حسد ولا شي غير انه سوء تخطيط وربي ما كتب لحبه لي لكل الامور الي ماصارت

    ورجعت لها واعتذرت وندمت

    تذكر ياخوي انه الظلم ظلمات يوم الحساب وانه الله ما ابعد عنك شي الا فيه شر لك وما قرب منك شي الا فيه خير لك

    وراجع نفسك بعد ما تركته ما مريت باي ازمه بسبب عينه او بحادث بسيط بسبب عينه او بفرقا او غيره لازم نمر كلنا بهلامور لنا مكتوب لنا

    الله يسامحني يوم اني ظلمتها صديقتي وخويتي وحبيبتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s