سهر ودراسة وعوار قلب

اعذروني فراح اطلق لنفسي العنان للسوالف شوي, احس اني من زمان ومن فترة ماعورت راسكم وياي بالسوالف الي مالها معنى. على العموم الحين الساعة 7:15 صباحا, من يوم الخميس الموافق 11 يناير 2007, الي مقعدني هالوقت اهو اني سهران ومانمت لحد الحين, قاعد ادرس لمادة الـecon -الاقتصاد- الي عايدها 3 مرات, اول مرة حضرتي تفلسفت وماعجبتني درجة امتحاني المنتصف فماحضرت الفاينل, والمرة الثانية انسحبت ولحد الحين مادري ليش انسحبت, وهالمرة اهي المرة الثالثة الي اخذها وان شاءالله بس اطوفها على خير واحضر الامتحان النهائي وخصوصا ان درجة الميد تيرم كانت اوكي وتونس.

حاليا انا مريض, والسبب ان مادري ليش قبل امتحاناتي باسبوع لازم امرض!! لحد الحين ماحالفني الحظ اني اعرف السبب, حالة نفسية مثلا؟ او من كثر التفكير, او يمكن دماغي يستجيب لشعوري, فلما احط في بالي اني راح امرض, امرض؟ كل شي جايز وخصوصا اني من اسبوع انتظر متى راح امرض والحمدالله مرضت امس, باركولي تحققت النبوءة.

لما اكون قاعد بروحي وخصوصا في الكوفي شوب اذا رحت متأخر في حدود الساعة 12 قبل لايسكرون بساعة, اكون قاعد بروحي والمكان هادئ ومب زحمة افكر بمواضيع وايد احب اني ابدي وجهة نظري فيها, وممكن اني اطلب ورقة وقلم واقعد اكتب الموضوع واخطط اني راح ارجع البيت واكتبه لكم. بس لآخر لحظة اغير رايي, يمكن لان كل شي وله حدود, بمعنى اني مب المفروض اشارك الغير بكل شي وبحياتي الشخصية, المفروض اني احتفظ ببعض الخصوصة.

كنت ابي اكتب موضوع عن تجنبي اني اقعد مع اهلي, كنت مختار عنوان " اتجنبكم ولكن لااكرهكم ". كنت حاب اني اتكلم عن اسباب تجنبي الاختلاط مع اهلي, على الرغم اني مالقيت هناك اي سبب يمنعني سوا اني تعودت على هالشي او وقتي مايسمح لي. كنت ابي اكتب عن الانتحار, ليس لاني فكرت بهالشي والعياذ بالله, بس كنت ابي اكتب رايي عن عقلياتهم والاسباب الي من الممكن ان تدفع الشخص للانتحار, على الرغم من انكاري ورفضي لهذه الفكرة تماما وماعتقد ان في يوم من الايام راح اقتنع بان هناك ولو سبب واحد للانتحار والعياذ بالله.

كنت ابي اكتب عن حلمي بالدراسة بالخارج, حلمي بالغربة, على الرغم من ان الي ذاقوا طعم الغربة لايمدحونها الا اني حابب اجربها. كنت ابي اكتب عن الهجرة او الاستقلالية, في صغري كنت دايما حاط في بالي ان اول ماوصل السن القانوني الي اهو 21 سنة راح اطلع من البيت واعيش حياة مستقلة وبروحي, اشتغل واسكن في شقة, بس اعترف لكم بشي, كل مااكبر سنة احس اني محتاج لاهلي اكثر وماقدر استغني عنهم ولو شيصير. بالرغم ان في بعض الاحيان تواجهني مشاكل مع اخواني الا اني احبهم حب مايمكن اوصفه لكم, يمكن ماابين لهم هالشي, بسبب اني خجول؟ ماعتقد .. بس يمكن لاني ماحب ابين مشاعري لحد وخصوصا لربعي او لأهلي, احب انهم يحسون انهم مايعنون لي شي, مادري شالسبب بس لاني ماحب ابين اني محتاج لهم, على الرغم من احتياجي لهم. نفس ماقلت لكم فكرة الهجرة كانت تراودني وخصوصا الهجرة الى كندا, وكانت متوفرة لي لو اني اصريت عليها واقدمت  عليها, الا اني كنت متردد. بالاحرى رافض الفكرة. فمالذي سأجنيه من الهجرة؟ كلها افكار مراهقين وافكار طفولة كانت تراودني.

 مممم اعتقد ان سوالفي خلصت, او بالاحرى خلني اخلي اشوي حق المرة الجاية, وخلني اجابل دراستي وادعوا لي بالتوفيق والنجاح.

 

 

 

 

 

 

 

 

 

Advertisements
هذا المنشور نشر في SwALif. حفظ الرابط الثابت.

3 Responses to سهر ودراسة وعوار قلب

  1. ~ Sweeety ~ كتب:

    good luck in ur exams =)

  2. ~@ صمت الوداع @~ كتب:

    هههه هذا حال الجميع .. بالتوفيق
    وعلى الاقل انت تكتب احسن من الي ما عنده القدره على الكتابه

    تقريبا في وجه تشابه معي حتى انه صارت لي روحه لكندا او بريطانيا بعد .. انا وصاحبي بس للأسف تكنسلت
    وانا اقول بسبب تردد صاحبي وهو الي كان يقول ابي اطلع من البيت ابي اعيش حياة خاصه فيني..
    ولكن صدق انت نسخه من صديقي المقرب لي حييل
    حتى اني شكيت انك تكون هو هههه

  3. الوحــــــــــــــــــــــــــيـــــــــــــــــــــــــد كتب:

    أنا بعد نفس حالتك تقريباً مع الأهل أبى أتجاهلهم و أتركهم لأن تفكيرهم غير عن تفكيري و لأنهم مايفهموني و إذا قعدت وياهم يقوللي أن اخوانك أحسن عنك في الدراسة أنت ليش غير عنهم هم أشطر عنك في الدراسة أنت كسلان كسلااااااااااااااااااااان
    لازم الواحد بينزعج من هالكلام و أنا عندي أخو دووووووووم يقارنوني به هو الأحسن في التصرفات و أنا الأسو و هو الشاطر و أنا الكسلان و هو ذكي و أنا الغبي شو أسويييييييييييي الله سبحانهو تعالى خالقني جييييييييييه آآآآآآآآآآه من هالدنيا آآآآآآه
    عسب جيييييييييييه كرهت نفسي و أهلي و بالأخص أخووووووووي كله منهم حسبي الله و نعم الوكييييييييل و حتى العالم بكبره
    لييييييش أنا عايش جذا ؟؟ لييييييش أنا غييييييييييير عنهم ؟؟ ليييييش لييييييييش ؟؟ و دوووووووم أفكر بالانتحااااااااااااار أعوذ بالله من الشيطااااااان الرجييييييييييييم …….. يمكن هاااا لضعف إيمااااااااااني الله …. استغفر الله العلي العظيم و دراااااااستي كرهته منهم اووووووووووف أعووووووذ بالله من الشيطان الرجييييييم لاااااااحووووول و لاااااا قوة إلا بالله و اسمحوووووووولي ازعجتكم من كلاااااااااااامي إلا ماله معنى لكم …….. و السموحة و ارجو الحل لحالتي ؟؟؟؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s