My BeSt FrIEnDS

 

السلام عليكم ورحمة الله وبركاته ..

الحين الساعة 7 الصبح وقبل اشوي راجع البيت, طبعا اليوم كنت سهران بره وسبحان الله كل يوم ابوي نايم واليوم اللي سهرت مارقد وصادني واكتشف اني برع البيت واتصل شرشحني وسكر التلفون في ويهي, بس عادي يموووووووون.

اتعرفون في فرق بين المعارف والربع, ومن ناحية المعارف فالحمدالله احس ان معارفي وايد, اما من ناحية الربع فاصدقائي يمكن ينعدون على الاصابع بس وحبيت اتكلم لكم عن اعز اعز اعز اعز ربعي اليوم.

اول واحد طبعا (ع.خ) طبعا هذا جيلووووو, احنا مسمينه جيلو, وايد احبه ومن اعز ربعي صج الي حتى اللقمة يشاركني فيها, حافظ اسراري وشيخهم كلهم اللي ماقدر على زعله ولايقدر على زعلي, اتذكر في فترة تهاوشنا مع بعض ويوم دزيت له مسج اعتذر له على طول اتصل لي يبيها من الله انه يكلمني, مب نفس غيري اللي وجودهم وعدمه واحد بالنسبة له. احبه وايد وايد وايد وايد, اهو الصدر الحنووون – لوووول – اهو الي يهتم اهو اللي يضحي مايحب يزعلني ووايد يحبني وانا ادري والكل يقول هالشي حتى لو اهو مايقولها بصريح العبارة بس يوصلني كلام يثبت هالشي.

ثانيهم (ب. السعودي), صج انه في السعودية ومب قريب مني بس الحمدالله كل يومين يجيني البحرين ونطلع ونستانس – الله يدوم الوناسة لحد يحسدنا بس – قل اعوذ برب الفلق, ترا العين حق -. وايد احبه وسافرت وياه 10 ايام بلياليهم وناسة مغامرات وعبط وجنون ,  حزة السفر لين يصيدنا شي اقوله انه لايفكر ولايحاتي مرده بيجي اليوم الي نتذكر هالمشاكل ونضحك, وبالفعل اليوم كان وياي في الشيشة وميتين ضحك على السوالف الي صادتنا والمشاكل والجنون. كنا انا وجيلو والسعودي الله لايحرمني منهم. واللي عجبني فيه او الي حببني فيه اني قبل يومين كنت مريض و بطني يألمني, وماقدر يستحمل وقال لي كلمة وايد تمت في بالي وحبيتها , يوم تألمت قال لي لاشعوريا :(( اللعن ابوووك لاتتأفف قلبي يعورني , امرض اذا انك مريض )). صج انه سبني بس عادي بس صج ترا حسيت ان لي معزة حتى قلت له صج اذا انا مريض انت تمريض.؟ الا يقولي بعد رفيجي اكيد امرض اذا انت مرضت.

ونجي حق (خ. السعودي). رفيج (ب) الروح بالروح ومتعرف عليهم مع بعض وصج مغامرات انا وياه وطلعات ومواقف حلوة صادتنا مع بعض على انه بعض الاحيان ينرفزني ويرفع لي الضغط بس اعتبره من اعز ربعي.

وطبعا (ع. ممممم ماعرف اسم ابوه بس اعتبره شيخ الدواسر كلهم) هههههه خلني امدح فيه لاني ادري انه بيقرا الي انا كاتبه. لا بس صج بدون مجاملة قبل كنت ماحبه, يمكن لاني فهمته غلط, كنت يمكن اعتبره راعي مشاكل ومايحبني وشايف روحه على الفاضي – سوووري وايد بس هذا الصج – بس الحين اعتبره من اعز ربعي وكاتم اسراري. وايد احب افضفض له عن مشاكلي, يمكن لان وجهة نظره بالمواضيع تعجبني وطريقة تفكيره العقلانية حلوة. احب الطلعة وياه وسافرت معاه مرة بروحنا ومرة يوم كنت ويا (ب. السعودي) كان موجود ويانا في الغرفة الي جنبنا بالفندق. كنا القروب كامل في هالسفرة, انا وجيلو و ب. و خ. السعوديين و ع.. تتخيلون مدى الينون الي ممكن يصير لما كل القروب يتجمع في سفره, الله يعود هالايام والله.

معارفي ان شاءالله بتكلم عنهم بموضوع ثاني, وطبعا اصدقاء الطفولة والاصدقاء الي اكتشفت انهم مايستاهلون يكونون اصدقاء طبعا هذا في موضوع خاص بكبره لهم.

بس حبيت كل واحد يقرا هالموضوع يقول ماشاءالله و قل اعوذ برب الفلق  من شر ما خلق  ومن شر غاسق اذا وقب  ومن شر النفاثات في العقد  ومن شر حاسد اذا حسد . صدق الله العظيم

تراني وايد اخاف من العين. وهذولا راس مالي في هالدنيا واحبهم حب ماينوصف واخاف ان في يوم حد يحسدنا على معرفتنا وخصوصا ان الحساد وايد.

وخلني الحين اروح ارقد وان شاءالله نرجع لكم بعد مانقوم ونشوف لكم موضوع ثاني نعور راسكم فيه

فمان الله وحفظه

 

 

Advertisements
هذا المنشور نشر في SwALif. حفظ الرابط الثابت.

2 Responses to My BeSt FrIEnDS

  1. طقيتكم بعين.. مالت امحرق بعد لا مني ولا مناك … سيدة على الهدف

    JK
    الله يخليكم لـ بعض..

    بس لفت نظري (ع.خ) جيلو…… و امممممم يحب Jenniffer Lopez ؟؟

    عـ العموم تجذبني المواضيع الي عن الصداقة.. وكنت بكتب عن ربعي بس خفت يغمى عليهم من الوناسة ولا شي ونبتلش
    بس شكلي بقلدك وبكتب عنهم 😛

    Keep Blogging
    بانتظار المواضيع الباقي….

  2. ........ كتب:

    السلام عليكم ورحمة الله وبركاته……

    حي الله بو جاسم.. كيف الحال ؟؟ شخبارك عساك مرتاح ؟؟؟

    ما نقول غير الله يسامحك الصراحة تذكرت الكل واحنه نسيتنه … ايييي الله يسامحك !!

    ربعك اللي كنه معااك بالثانوية على أيام الهداية نسيتنه يا بو جاسم وانخص اهنيه بالربع

    (( شباب الفلاح )) وانت اتعرفهم انشالله ما نسيتهم … وانا واحد منهم اللي كاتب لك هالموضوع

    المهم حبيت اسلم عليك وانتطمن عليك ونسأل عنك ونبلغك سلام الشباب لك

    لأنهم دووم يسألون عنك ومشتاقين لك وانت خبر خير!!

    المهم انشالله انجوفك جريب … وعيدك مبارك مقدما

    وفي أمان الله.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s